10 góð ráð fyrir kaupendur
Það að kaupa fasteign er eitt stærsta skrefið sem flestir taka í lífinu - og því mikilvægt að vera vel undirbúinn áður en lagt er af stað í leitina. Með góðri yfirsýn, skipulagi og réttri ráðgjöf er hægt að spara sér bæði tíma, peninga og óþarfa áhyggjur. Hér höfum við tekið saman 10 góð ráð fyrir kaupendur sem geta hjálpað þér að stíga næstu skref með öryggi og trausti.
1 .Kanna lánamöguleika og greiðslugetu
Áður en fasteignaleit hefst er mikilvægt að fá yfirsýn yfir þá lánamöguleika sem eru í boði og gera sér grein fyrir eigin greiðslugetu. Það auðveldar ákvarðanatöku og sparar tíma í ferlinu.
2. Gerðu þarfagreiningu
Ákveddu fyrirfram hvaða kröfur þú hefur til eignarinnar. Þarfagreining flýtir fyrir leitinni og hjálpar þér að finna eign sem hentar þínum aðstæðum og lífsstíl.
3. Hafðu reynslumikinn aðila með í skoðun
Gott er að fá með sér einhvern sem hefur reynslu af fasteignaviðskiptum eða þekkingu á byggingum. Þannig má sjá atriði sem annars gætu farið framhjá.
4. Lestu söluyfirlitið vandlega
Söluyfirlitið er lykilskjal í fasteignaviðskiptum. Þar eiga að koma fram allar helstu upplýsingar, m.a. um ástand eignarinnar, tilgreinda galla, hlutfall íbúðar í fjöleignahúsi og afhendingarástand.
5. Skannaðu markaðinn vel
Leitin getur verið tímafrek og þreytandi. Gott er að skoða markaðinn vel á netinu og þrengja fljótt að þeim eignum sem raunverulegur áhugi er á.
6. Gerðu þér grein fyrir kostnaði við flutninga
Það fylgir alltaf ákveðinn kostnaður því að skipta um húsnæði. Hafðu hann í huga áður en kaupin eru frágengin.
7. Skoðaðu eignina sem tóma
Húsgögn geta breytt upplifun af rýminu. Mikilvægt er að ímynda sér eignina tóma, þar sem hún getur litið mun stærri eða minni út en hún er í raun.
8. Vandaðu tilboðsgerðina
Mundu að undirritað kauptilboð er skuldbindandi (að því gefnu að fyrirvarar leysist). Undirbúðu þig því vel og leitaðu ráðgjafar áður en tilboð er gert.
9. Leitaðu til fasteignasalans ef upp koma ágreiningsefni
Ef eignin reynist ekki vera í samræmi við söluyfirlit eða kaupsamning skaltu strax hafa samband við fasteignasalann til að fá ráðgjöf.
10. Geymdu öll skjöl og kvittanir
Varðveittu vel öll gögn sem tengjast viðskiptunum, s.s. kaupsamning, afsal, veðskuldabréf, kvittanir, greiðslur á lánum, fasteignagjöld og húsgjöld. Þau geta reynst dýrmæt í framtíðinni.
Með því að hafa þessi ráð í huga eykur þú líkurnar á því að fasteignakaupin gangi vel og að ferlið verði bæði öruggt og ánægjulegt. Góður undirbúningur er besta tryggingin fyrir farsælum viðskiptum – og því aldrei of snemmt að byrja að afla sér réttra upplýsinga og traustrar ráðgjafar.